Средба во Белград на претставници на превозниците од регионот
Почитувани членки,
Претставници на регионалните асоцијации од Србија, Босна и Херцеговина и Македонија на 12.12.2024 година во Белград одржаа состанок на кој главна тема беше правилото за престој во шенген зоната од 90/180 дена со барање за изземање на „професионалните возачи на моторни возила“ под ист услов како и другиот кабински екипаж во друг вид на транспорт согласно регулативата 2016/399 член 6а став (3) точка (e), ЕЕС системот не се однесува на пилоти, бродски екипаж и железнички персонал, односно вршителите на бродски, авио и железнички превоз на стока и патници се изземени од обврската да им се бројат деновите на престој, а професионалните возачи кои се вршители на превоз во патниот сообраќај на стока и патници се соочуваат со значителни бариери (дискриминација) кои ги спречуваат да ги вршат своите работни обврски ефикасно како и другите учесници генерално во превозот.
Договорено е да продолжи заедничката реакција и доставување на барање до комисијата на ЕУ, доставување дописи до амбасадорите на европска комисија во секоја држава пооделно, како и континуирано доставување на барање до надлежните органи во секоја држава пооделно (Влада, МНРНТ, МТ) да се здружат и заеднички да се изборат за укинување на дискриминацијата која се спроведува само за екипажот на превозот во патниот сообраќај.
Претставниците на асоцијацијата од Босна и Херцеговина побараа поддршка од превозниците од Македонија, Турција, Албанија, Молдавија, Црна Гора и Србија, доколку не се постигнат бараните ефекти со преговори и се пристапи кон преземање на подрастични мерки за блокирање на гранични премини за влез или излез од територија на ЕУ, да се солидаризираат и заеднички да се бориме за правата на екипажот на возилата за превоз во патниот сообраќај.
Во текот на разговорите се разменија мислења за преземени мерки во однос на проблемите со кои се соочуваат превозниците при најава во SENT системот во Полска, законската основа и начинот на исплата на дневници за службени патувања на возачите, начин на издавање дупликат на регистарски таблици наместо изгубени, украдени или уништена за возила кои вршат комерцијален превоз на стока и патници, како и размена на искуства при решавање на проблеми на превозниците при изрекување на парична казна за сторен прекршок во соодветна држава, како и размена на информации за адвокати по држави кои се специјализирани за проблемите поврзани со превозот во патниот сообраќај.
Во однос на проблемите со кои се соочуваат нашите превозници и разменетите информации со сродните асоцијации, во наредниот период ќе се превземаат соодветни активности и повторно праќање на барања до институциите во нашата држава за решавање на проблемите со кои се соочуваме.
Ваш Макам-транс