Одржана традиционалната средба на македонски превозници

Почитувани членки,

На 26.09.2024 година во ресторан Потковица Скопје се одржа деветнаесетата традиционална средба на превозници во организација на Асоцијација Макам-транс.

На средбата покрај присутните превозници како гости присуствуваа заменик министерката за транспорт г-ѓа Калтрина Зеколи Шаќири, претставници од секторот за патен сообраќај и инфраструктура, директорот на царинската управа г-дин Бобан Николовски, претставник на царинската управа и директорката на Консалтинг за стратешки развој г-ѓа Кристина Хаџи-Василева.

Генералниот секретар на асоцијацијата Биљана Муратовска, во своето обраќање се заблагодари на соработката на заменик министерката за транспорт и на директорот на Царинска управа, ја истакна важноста од меѓусебната комуникација и потребата заедно да се ангажираме за подобрување на условите за вршење на меѓународен превоз на стока. Во нејзиниот говор ја промовираше и новата веб платформа на асоцијацијата, која беше изработена со поддршка од Агенцијата на САД за меѓународен развој (УСАИД), за што директно им се заблагодари на Консалтинг за стратешки развој и на г-ѓа Кристина Хаџи-Василева кои се воедно и спроведувачи на УСАИД проектот „Активност за јакнење на деловниот екосистем“.

Манифестацијата не би била комплетна без присуство на нашите соработници и ВИП членки. Огромна благодарност до сите превозници кои присуствуваа на манифестацијата.

Како дел од настанот беше и презентацијата за правилата кои треба да се почитуваат во претстојната распределба на годишни ЕКМТ дозволи и годишни поединечни транспортни дозволи за 2025 година.

Албумот со слики од средбата, објавен е на нашата Facebook страна и во делот галерии на нашата веб страна. 

Ваш Макам-транс